നിയമപ്പോരാട്ടങ്ങളും ആക്രമണങ്ങളും അതിജീവിച്ച് കാബോഡിസ്കേപ് ഇന്ന് തീയറ്ററിൽ എത്തും

പപ്പിലീയോ ബുദ്ധയ്ക്ക് ശേഷം വളരെയധികം നിയമപ്പോരാട്ടങ്ങളും ആക്രമണങ്ങളും നേരിട്ട ജയൻ ചെറിയാന്റെ കാബോഡിസ്കേപ് എന്ന പ്രശസ്തമായ സിനിമ തീയേറററുകളിലെത്തുന്നു. സിനിമയുടെ പോസ്റററുകള്‍ പോലും തെരുവില്‍ ആക്രമിക്കപ്പെടുന്ന ഈ സാഹചര്യത്തിൽ ഈ സിനിമയെ പിന്തുണയ്ക്കാന്‍ ജനാധിപത്യത്തിലും സര്‍ഗാത്മക ആവിഷ്ക്കാര സ്വാതന്ത്ര്യത്തിലും വിശ്വസിക്കുന്ന പ്രേക്ഷകര്‍ തയ്യാറാവണം..കാവിക്കൊടിയും ഗോള്‍വാര്‍ക്കറുടെ ചിത്രവുമൊന്നും ഈ സിനിമയിൽ ഉപയോഗിക്കാന്‍ പാടില്ലെന്ന കര്‍ശന നിബന്ധനകളോടെയാണ് സെന്‍സര്‍ബോര്‍ഡ് അനുമതി നല്‍കിയിരുക്കുന്നത്. പല സ്ഥലങ്ങളിലും തീയേറ്റർ ലഭിച്ചിട്ടില്ല. ഒക്ടോബർ 5മുതൽ രാത്രി 7.30ന് തിരുവനത്തപുരം ഏരീസ്പ്ളസില്‍ ഒരു പ്രദര്‍ശനം ഉണ്ടാവും. മററു സ്ഥലങ്ങളില്‍ തീയേററര്‍ ലഭിക്കുന്നതിനനുസരിച്ച് റിലീസുണ്ടാവും..

ഇത്രയധികം ദീർഘമായ നിയമപോരാട്ടങ്ങൾക്കു ശേഷം ഒരു സിനിമ തീയേറ്ററിൽ എത്തുക എന്നതു തന്നെ മലയാളത്തിൽ അപൂർവമാണ്. സാധാരണഗതിയിൽ ഇത്തരം നിയമപോരാട്ടങ്ങളിലേക്ക് പോകുന്ന സിനിമകൾ പിന്നീട് വിസ്മൃതിയിലേക്ക് പോകുകയാണ് പതിവ്. നമ്മുടെ കേരളത്തിലെ എക്സിബിഷൻ സമ്പ്രദായവും ഡിസ്ട്രിബ്യൂഷൻ സംവിധാനവും ഇൻഡിപെൻഡഡ് ആയ എല്ലാ വോയ്സിനെയും നിശബ്ദമാക്കുന്ന തരത്തിലാണ് നിലനിൽക്കുന്നത്. എസ്റ്റാബ്ളിഷ്ഡ് ആയ വിതരണ സമ്പ്രദായത്തിന്റെ സപ്പോർട്ട് ഇല്ലാത്ത ഒരു സിനിമയും വെളിച്ചം കാണാറില്ല. ഈ സിനിമയുടെ കാര്യത്തിൽ അതിനെ മറികടക്കേണ്ടിയിരിക്കുന്നു. എന്ന് സംവിധായകൻ ജയൻ ചെറിയാൻ പറഞ്ഞു.

അനുനിമിഷം നമുക്ക് നഷ്ടമായിക്കൊണ്ടിരിക്കുന്ന ഒരു ഫ്രീ സ്പെയ്സുണ്ടല്ലോ, ഇതൊരു പൊളിറ്റിക്കൽ ആക്ടാണ്. സിനിമ എന്നു പറയുന്ന ഈ മീഡിയം തന്നെ വളരെ പൊളിറ്റിക്കലായ ഒരു മീഡിയമാണ്. കമ്പോളസിനിമയായാലും, എന്തു തരം സിനിമയായാലും, അതിനൊരു ശക്തിയുണ്ട്. ഇന്ത്യ പോലുളള, ലോകത്തിലെ ഏറ്റവും വലിയ ജനാധിപത്യ സമൂഹം എന്ന് നമ്മൾ വീമ്പിളക്കുന്ന ഒരു സമൂഹത്തിന് ഇൻഡിപെൻഡന്റ് ആയിട്ടുളള ഒരു എക്സ്പ്രഷൻ, ഒരു സിനിമയെ കുറിച്ചും സാധ്യമല്ല എന്നതാണ് വാസ്തവം. ഈ സിനിമക്കെതിരെ നിയമപ്രശ്നമായി ഉയർത്തിക്കൊണ്ടുവന്ന ഏറ്റവും വലിയ ആരോപണം, ഹോമോസെക്ഷ്വാലിറ്റിയെ പ്രചരിപ്പിക്കുന്നു എന്നതാണ്.

ഇന്ത്യൻ പീനൽ കോഡിൽ ക്രിമിനൽ കുറ്റമെന്ന് കല്പിക്കപ്പെട്ടിട്ടുളള ഒരു സെക്ഷ്വൽ ആക്ട് നമ്മൾ പ്രോത്സാഹിപ്പിക്കുന്നു, അതൊരു ക്രിമിനൽ കുറ്റമായി ഉയർത്തിക്കാട്ടി ഈ സിനിമയെ തടയിടാനും അവർ ശ്രമിച്ചു. പക്ഷെ, ആ തടസം ഇല്ലാതാക്കുന്ന ഒന്നാണ് ഈയടുത്ത് സെക്ഷൻ 377 റദ്ദാക്കിയ കോടതിവിധിയിലൂടെ ഉണ്ടായത്. അതിനുമപ്പുറം, എൽജിബിടി മൂവ്മാമെന്റുമായി ബന്ധപ്പെട്ട കേരളത്തിലെ പ്രധാനപ്പെട്ട ആക്ടിവിസ്റ്റുകളെല്ലാം ഈ സിനിമക്കൊപ്പമുണ്ടായിരുന്നു. ആ നിലയ്ക്ക്, ഇത് കേരളത്തിന്റെ എൽജിബിടി മൂവ്മെന്റിന്റെ സിനിമ കൂടിയാണ്. ഒരു കൊളോണിയൽ കരിനിയമം, വളരെ യുറോ സെൻട്രിക് ആയിട്ടുളള, വിക്ടോറിയൻ സദാചാരത്തിൽ അധിഷ്ഠിതമായ ഈ നിയമമായിരുന്നു കാലങ്ങളായി ഇന്ത്യയിലെ ലൈംഗികന്യൂനപക്ഷങ്ങളെ അടിച്ചമർത്താൻ ഉപയോഗിച്ചിരുന്നത്. അത് ഇല്ലാതാവുന്നത് ഒരു വലിയ സ്വാതന്ത്ര്യപ്രഖ്യാപനമാണ്.അതിന്റെ വെളിച്ചത്തിൽ കൂടിയാണ് നമ്മൾ ഈ സിനിമ റിലീസ് ചെയ്യുന്നതെന്ന് അദ്ദേഹം കൂട്ടിച്ചേർത്തു

Ka Bodyscapes (2016) official Trailer from Jayan on Vimeo.