ജോതിഷം സത്യമാണെന്ന് തെളിയിക്കാനുള്ള പത്തുലക്ഷം രൂപയുടെ വെല്ലുവിളി ഏറ്റെടുത്ത് ഹരിദാസ് പണിക്കർ

സുമനൻസാറിന്റെ പത്തുലക്ഷം പോയതുതന്നെ. ആലപ്പുഴയിലെ ആദ്യകാല യുക്തിവാദിയും റിട്ടയേഡ് അദ്ധ്യാപകനുമായ പി പി സുമനൻ സാറിൻറെ ജോതിഷം സത്യമാണെന്ന് തെളിയിക്കുന്നവർക്ക് പത്തുലക്ഷം രൂപ നൽകുമെന്ന വെല്ലുവിളി ഏറ്റെടുത്ത് ഹരിദാസ് പണിക്കർ രംഗത്ത്. ഫെയ്‌സ്‌ബുക്കും വാട്സ്ആപ്പുമൊക്കെ വരുന്നതിന് മുൻപ് തന്നെ ആലപ്പുഴയിൽ പോസ്റ്റർ എഴുതിവെച്ചും പത്രത്തിലൂടെയുമെല്ലാം സുമനൻ സാർ ഈ വെല്ലുവിളി ഉയർത്തിയിരുന്നു. ഇപ്പോൾ അദ്ദേഹം ഫെയ്സ്ബൂക്കിലും അത് തുടർന്നുകൊണ്ടിരിക്കുകയാണ്.

ഇരുപതു പേരുടെ ഗ്രഹ നില നൽകും അവർ സ്ത്രീയോ, പുരുഷനോ, ജീവിച്ചിരിപ്പുണ്ടോ മരിച്ചോ, കല്യാണം കഴിഞ്ഞോ ഇല്ലയോ, കുട്ടികളുണ്ടോ ഇല്ലയോ , എന്താണ് ജോലി എന്നു ഗണിച്ചു പറയാൻ ഏതെങ്കിലും ജ്യോതിഷികൾക്ക് പറ്റുമെങ്കിൽ പത്തുലക്ഷം രൂപാ നൽകാം എന്നായിരുന്നു പി പി സുമനൻറെ വെല്ലുവിളി

എന്നാൽ കാണിപ്പയ്യൂരിന്റെ വിഷുഫലം സോഷ്യൽമീഡിയയിൽ വൈറലായതോടുകൂടി മറ്റു ജ്യോതിഷ പണ്ഡിതരുടെയും വിശ്വാസ്യത ചോദ്യപ്പെട്ടിരിക്കുകയാണ്.അതുകൊണ്ട് തന്നെ ജോതിഷം എന്ന ശാസ്ത്രത്തേയും ശാസ്ത്രജ്ഞരേയും അവഹേളിക്കുന്ന യുക്തിവാദികളുടെ പ്രചരണങ്ങൾക്ക് അറുതിവരുത്താനാണ് താൻ ഈ വെല്ലുവിളി ഏറ്റെടുത്തതെന്നും ഇത് ജ്യോതിഷിയുടെ അതിജീവനത്തിൻറെ പ്രശ്നം കൂടിയാണെന്നും ഹരിദാസ് പണിക്കർ പറഞ്ഞു. ദക്ഷിണ ഭാരതീയ ജ്യോതിഷ പണ്ഡിത സംഘം കേരളാ ഘടകം പ്രസിഡന്റാണ് ജ്യോതിഷ തന്ത്രയോഗാ ഗുരു കൂടിയായ ഹരിദാസ് പണിക്കർ.

ജോതിഷം തെറ്റാണെന്ന് തെളിയിക്കാൻ ഇന്നുവരെ ഒരുയുക്തിവാദിക്കും കഴിഞ്ഞിട്ടില്ലഎന്നും അടുത്ത പുതുവർഷ ഫലത്തിൽ കാണാമെന്നാണ് ഹരിദാസ് പണിക്കർ സുമനൻ സാറിനെ വെല്ലുവിളിച്ചിരിക്കുന്നത്. പുതുവര്‍ഷം നിങ്ങള്‍ക്കെങ്ങനെ? അശ്വതി മുതൽ രേവതി വരെ നാളുകാരുടെ പുതുവർഷ ഫലം പ്രവചിച്ചുകൊണ്ടാണ് ഹരിദാസ് പണിക്കർ വെല്ലുവിളി ഏറ്റെടുത്തിരിക്കുന്നത്.

ജോതിഷം തട്ടിപ്പാണെന്ന് വിവരമില്ലാത്ത ചില യുക്തീവാദികൾ പ്രചരിപ്പിക്കുന്നതാണ്. പ്രശ്നം ദാർശനീകവും ആത്മീയവുമാണ്..”ബ്ര”യിൽ തുടങ്ങുന്നതിനെല്ലാം ദിവ്യത്വം.ബ്രാഹ്മണൻ “ബ്ര”,ബ്രഹ്മം ,ബ്രഹ്മർഷി,ബ്രഹ്‌മാവ്‌ ബ്രാഹ്മ മുഹൂർത്തം എന്നിവ പോലെ ഗൗളി ശാസ്ത്രം പക്ഷിശാത്രം ഇതൊക്കപോലെ ജ്യോതിഷവും ശാസ്ത്രമാണ്.

1194 –ാം ആണ്ട് ചിങ്ങമാസം ഒന്നിനു (2018 ഒാഗസ്റ്റ് 17) പുതുവർഷം പിറക്കുകയാണ്. അശ്വതി മുതൽ രേവതി വരെയുള്ള നാളുകാർക്ക് ഈ വർഷം അനുഭവവേദ്യമാകുന്ന പൊതുഫലങ്ങളാണ് ഇവിടെ പ്രവചിക്കുന്നത്. ഗുണദോഷ സമ്മിശ്രമായ ഫലങ്ങൾ ഓരോരുത്തരിലും മാറി മാറി അനുഭവപ്പെടാം. നിത്യമായ ഈശ്വര ഭജനവും ദേവാലയദർശനവും പ്രാർഥനയും ഗുണഫലങ്ങൾ.

പഞ്ചാം ഗണനം പ്രശ്നം ജാതകം മുഹൂർത്തം എന്നിവയിൽ കേരളത്തിനകത്തും പുറത്തും അറിയപ്പെടുന്ന പണ്ഡിത ശ്രേഷ്ഠൻ ആണ് ജ്യോതിഷ രത്നം ഹരിദാസ് പണിക്കർ. നിരവധി അംഗീകാരങ്ങളുെട ഉടമയും ദൈവജ്ഞനുമായ ഇദ്ദേഹം കാൽ നൂറ്റാണ്ടിലേറെയായി ജ്യോതിഷ സംബന്ധമായ ഉപദേശങ്ങളും നിർദ്ദേശങ്ങളും നൽകി വരുന്നു.

“പുതുവര്‍ഷം നിങ്ങള്‍ക്കെങ്ങനെ?” അച്ചട്ടായിരിക്കുമെന്ന് വെല്ലുവിളിച്ചിരിക്കുന്ന ഹരിദാസ് പണിക്കരുടെ ഫലപ്രവചനം

മേടക്കൂറ്…(അശ്വതി, ഭരണി, കാർത്തിക )

സൗഹൃദ സംഭാഷണത്തിൽ പുതിയ ഡിങ്കോയിസ ആശയങ്ങൾ ആവിർഭവിക്കും ഡിങ്കോയിസ്റ്റ് ആശയങ്ങൾ കടൽകടന്ന് വളരുകയും ഡിങ്കോയിസം ഗ്ലോബലയും പിന്നെയും വളർന്നാൽ ഒരുപക്ഷേ ഡിങ്കയിസം ഗാലക്സിയായും വരെ പിളരാനുള്ള സാധ്യത കാണുന്നു. ഫേസ് ബുക്ക് യുട്യൂബ് മേഖലകളിൽ സജീവ സാന്നിധ്യത്തിനാൽ അഭൂതപൂർവമായ തെറികൾ കേൾക്കാൻ ഇടവരാൻ സാധ്യത കാണുന്നു .ഈ നാളിൽ പിറന്നവർ വലം പിരി ജട്ടി ധരിക്കുന്നത് ഉന്നത വിജയത്തിന് അഭികാമ്യമാണ് . ഡിങ്കോയിസ്റ്റ് ആയതിനാൽ അവഗണിക്കപ്പെടുന്ന അവസ്ഥ മാറി പരിണിക്കപ്പെടുന്നതിനാൽ ആശ്വാസം തോന്നും.

എടവക്കൂറ് ( രോഹിണി,മകയിരം)

അവിചാരിതമായി ഉണക്കാൻ ഇട്ട ഈമാനുള്ള ചുവന്ന ജട്ടികൾ നഷ്ട്ടപെടും , ഗൃഹനിർമാണത്തിനു വായ്പ്പ നല്കുവാനുള്ള അപേക്ഷ പേന കൊണ്ടാകും എഴുതുന്നത് , പലപ്പോഴും മേലധികാരിയുടെ തന്തയെ സ്മരിക്കാൻ നിർബന്ധിതരാകും. പ്രതികൂല സാഹചര്യങ്ങളെ അതിജീവിക്കാൻ പങ്കില നാഥൻ ശ്രീ ഡിങ്കന് കപ്പ കൊണ്ട് തുലാഭാരം നേരുക എന്ന പരിമിതിയെ സാധ്യതയായും ഉപയോഗപ്പെടുത്താവുന്നതാണ്.

മിഥുനക്കൂറ് ( തിരുവാതിര, പുണർതം)

ഈ നാളിൽ പിറന്നവർക്ക് രാത്രിയിൽ ഇരുട്ടും , പകൽ വെളിച്ചവും അനുഭവപ്പെടും . പ്രൈവറ്റ് ബസ്സുകളിൽ യാത്ര ചെയ്യാൻ അവസരം ലഭിക്കും .അവ്യക്തമായ പണമിടപാടുകളിൽ ( ചില്ലറ കൊടുക്കാതെ നോട്ട് കൊടുക്കുന്ന വഴി ) കണ്ടക്ടറിൽ നിന്നും ഒരുതരം ചൊറിഞ്ഞ വാക്കുകൾ കേൾക്കാൻ ഇടയാകും .കൂടാതെ അയല്പക്കത്തെ ആരുടെയെങ്കിലും വീട്ടിൽ വളരെ സമാധാനപരമായ അടിപിടിയോ ,ലെളിതമായ തെറിവിളിയോ, കത്തി കുത്തോട്‌ കൂടിയുള്ള നിലവിളിയോ നേരിൽ കാണാൻ അവസരവും ലഭിക്കും

കർക്കടകക്കൂറ് (പൂയം, ആയില്യം)

സ്വന്തം ഗ്രഹത്തിൽ ദിവസം മൂന്ന് നേരം പവർ കട്ട്‌ അനുഭവപ്പെടാൻ സാധ്യത കാണുന്നു , ജലവിതരണ പൈപ്പിൽ വെള്ളത്തിന് പകരം ശബ്ദത്തോട് കൂടിയ വായു വരുന്നതായി കാണാം. ഹോട്ടൽ ഭക്ഷണത്തിന് അവസരം ലഭിക്കും ,സാമ്പാറിൽ വെള്ളം കൂടുതൽ ഉള്ളതായി അനുഭവപ്പെട്ടാലും ,ഹോട്ടൽ ബില്ലിൽ മാറ്റം ഉണ്ടാകാൻ സാധ്യത കാണുന്നില്ല .

ചിങ്ങക്കൂറ് (മകം, പൂരം, ഉത്രം )

സങ്കീർണമായ പ്രശ്നങ്ങളാണ് ഇവർക്ക് വാരാൻ ഇരിക്കുന്നത് , ചെരുപ്പിന്റെ വള്ളി പൊട്ടുക, ട്രെയിൻ സമയത്ത് ലഭിക്കാതിരിക്കുക , Bus ന് കൈ കാണിക്കുമ്പോൾ ഡ്രൈവർ കൊഞ്ഞനം കാട്ടി നിർത്താതെ പോകുക എന്നിവ കാണുന്നുണ്ട്. രാത്രി ഉറങ്ങാൻ കിടന്നിട്ട് രാവിലെ 6 മണിക്ക് ശേഷം ഉറക്കത്തിൽ നിന്നും ഉണരുകയാണെങ്കിൽ നേരം വെളുത്തതായി കാണപെടും .ഇപ്പോൾ ഇതിനൊരു ശാശ്വത പരിഹാരം കാണുന്നില്ല.

കന്നിക്കൂറ് ( അത്തം, ചിത്തിര )

മീൻ കറിക്ക് എരിവ് കൂടാൻ സാധ്യത ഏറെയാണ് .കന്നിക്കൂറിൽ ജനിച്ചവരുടെ കിണറ്റിലെ വെള്ളത്തിന്റെ അളവ് മഴക്കാലമായ ജൂൺ , ജൂലൈ മാസങ്ങളിൽ ക്രമാതീതമായി ഉയരും . വിളിക്കാത്ത കല്ല്യാണത്തിന് പോയി തിന്നാൻ ആശ്രാന്ത പരിശ്രമം വേണ്ടി വരും.

തുലാക്കൂറ് ( ചോതി, വിശാഖം ).

കാമുകിയുടെ സഹോദരൻ പഞ്ഞിക്കിടാൻ സാധ്യത വളരെ കൂടുതലായതിനാൽ കാമുകിക്ക് ജേഷ്ഠൻ ഉണ്ടോ എന്ന സത്യാവസ്ഥ അന്വേഷിച്ചറിയാതെ പിറകേ നടക്കുന്നത് ദേഹക്ഷീണം, ഒടിവ് , ചതവ് ,പല്ലിന്റെ താളം തെറ്റൽ എന്നിവക്ക് സാധ്യതയുണ്ട് .ഈ മാസം ചിക്കൻ കറിയോട് കൂടിയ കപ്പ പുഴുക്ക് തിന്നാൻ അർഹമായ അവസരം വന്നു ചേരും മാസത്തിൽ ഒരിക്കൽ പങ്കില നാഥന് ജട്ടികൊണ്ട് അഭിഷേകം ചെയ്യുന്നത് നല്ല വാർത്തകൾ കേൾക്കാൻ ഇടവരുത്തും .

വൃശ്ചികക്കൂറ് ( അനിഴം, തൃക്കേട്ട)

ട്രാഫിക് പോലീസ് പെറ്റി തന്ന് ആദ രിക്കാനിടയുണ്ട് , , മെയ്‌ ആദ്യ പാദം മുതൽ ഒക്ടോബർ മാസം അവസാനം വരെ വീട്ടിൽ നിന്നും പണം അടിച്ച് മാറ്റുന്നവർക്ക് ഡിങ്ക ശനിയാണ്. മാതാപിതാക്കളിൽ നിന്നും ” നായിന്റെ മോനെ “എന്ന് ദിവസേന കേൾക്കാൻ ഇടവരും . ഇവന് / ഇവൾക്ക് പകരം ഒരു വാഴ വെച്ചാൽ മതിയെന്ന് രെക്ഷിതാക്കൾ വ്യാകുലപെടാൻ ഇടയുണ്ട്

ധനുക്കൂറ് (മൂലം, പൂരാടം, ഉത്രാടം )

അപ്രതീക്ഷിതമായി പോലീസ് ഓടിക്കും , മുന്നോട്ട് നോക്കി മാഷാ ഡിങ്കാ വിളിച്ച് ഓടുന്നതാണ് അഭികാമ്യം . എന്നാൽ വഴുതി വീഴാതെ സൂക്ഷിക്കണം. കാമുകന്റെ / കാമുകിയുടെ തള്ളുകൾ കേട്ട് അഭിമാനവും സന്തോഷവും തോന്നും. ഭൂമി വാങ്ങാനുള്ള സാഹചര്യം പണം ഇല്ലാത്തതിനാൽ കേൾക്കാൻ മാത്രം യോഗമുണ്ടാകും .

മകരക്കൂറ് ( തിരുവോണം അവിട്ടം )

ആർഭാടം കാണിക്കുന്നതിനായി വാങ്ങിയ വസ്ത്രങ്ങൾ പട്ടി കടിച്ച് കീറാൻ ഇടയുണ്ട്. താരതമ്യേന കുറഞ്ഞ വിലയ്ക്ക് മത്തി , ചൂര ,കിളിമീൻ , നെയ്മീൻ എന്നിവ ലഭിക്കാൻ അവസരം വന്നു ചേരും. നുണകൾ പറഞ്ഞു ഫലിപ്പിക്കാൻ സാധിക്കാത്തതിനാൽ പാശ്ചാതപിക്കും. സമാധാന പരമായി TV സീരിയൽ കാണുവാൻ ഭർത്താവിന് അൽപ്പം ഫ്യുരിഡാൻ കലക്കി കൊടുത്താൽ ഫലം ഉടനടി ലഭിക്കുന്നതായി കാണാം.

കുംഭക്കൂറ് (ചതയം, പൂരുരുട്ടാതി )

ഡിങ്കോയിസ ആദ്ധ്യാത്മിക ആത്മീയ പ്രഭാഷണങ്ങൾ കേൾക്കാൻ അവസരം ലഭിക്കും .വീട്ട് മുറ്റത്തെ തെങ്ങിൻ ചുവട്ടിൽ സ്ഥാനം ഉറപ്പിച്ചാൽ സമാധിയാകാൻ ഇടയുണ്ട് . അവസ്ഥാഭേദങ്ങൾക്കനുസരിച്ചു മാറുന്ന സുഹൃ ത്തിനെ പുളിച്ച തെറികൾ കൊണ്ട് അഭിസംബോധന ചെയ്യുന്നത് പതിവാകും

മീനക്കൂറ് ( ഉത്രട്ടാതി, രേവതി)

ഓസിന് കിട്ടിയ OCR,വിദേശമദ്യം എന്നിവയിൽ സോഡ ഉപയോഗം താൽക്കാലികമായി ഉപേക്ഷിക്കും.കൂടാതെ വിദ്യാഭ്യാസവുമായിബന്ധപ്പെട്ട യാത്രയിൽ ബൈക്കിൽ ലിഫ്റ്റ്‌ കിട്ടാൻ സാധ്യതയുണ്ട് .കുളിക്കുമ്പോൾ സോപ്പ് കയ്യിൽ നിന്നും താഴെ വഴുതി വീഴുവാൻ ഇടവരും . ഏതു പ്രതിസന്ധിഘട്ടത്തിലും താങ്ങായി ഡിങ്കാനുഗ്രഹം അനുഭവപ്പെടും, ഞായർ ദിവസങ്ങൾ പൊതുവെ അവധി ദിവസങ്ങളായി തോന്നുമെങ്കിലും അതിലൊരു ചെന്നായ നീതി ഇല്ലേ എന്നൊരു സന്ദേഹം തോന്നാൻ സാധ്യത കാണുന്നു.

ചോദിക്കൂ പറയാം: നിങ്ങളുടെ സംശയങ്ങൾക്ക് മറുപടി

ചോ:1) എന്താണ് ഡിങ്കോയിസം?
ഉ: ) എന്താണ് ഹിന്ദുയിസം? എന്താണ് ഇസ്ലാം? എന്താണ് ക്രിസ്ത്യാനിറ്റി? ആ കൂട്ടത്തിൽ ഒന്നാണ് ഡിങ്കോയിസം.

ചോ:2) ഡിങ്കൻ ദൈവമാണോ?
ഉ: ) ദൈവം ഒന്നേയുള്ളൂ. ചിലർ പരബ്രഹ്മം എന്നും ചിലർ അള്ളാഹു എന്നും ചിലർ കർത്താവ് എന്നും ചിലർ ഡിങ്കൻ എന്നും വിശ്വസിക്കുന്നു.

ചോ:3) ഡിങ്കൻ ഒരു കാർട്ടൂൺ കഥാപാത്രമല്ലേ?
ഉ: ) അപ്പൊ ചോട്ടാ ഭീം? ജയ് ഹനുമാൻ? ക്രിസ്ത്യൻ സ്കൂളുകളിലെ മോറൽ സയൻസ് പുസ്തകങ്ങൾ? അക്ഷരങ്ങളും കാർട്ടൂണും കണ്ടാൽ കത്തിയ്ക്കുന്നവരെ പരാമർശിച്ചിട്ട് കാര്യമില്ല, അതിനാൽ പറയുന്നില്ല.

ചോ:4) ബാലമംഗളം ഒരു തമാശ പുസ്തകമല്ലേ?
ഉ: ) പർവ്വതം പൊക്കിപ്പറന്ന വാനരൻ്റെ കഥ പറഞ്ഞ പുസ്തകം തമാശയാണോ?
ആണിൻ്റെ വാരിയെല്ലിൽ നിന്നും പെണ്ണിനെയുണ്ടാക്കിയെന്നു പറഞ്ഞ പുസ്തകം തമാശയാണോ?
മരണശേഷം സ്വർഗ്ഗത്തിൽ മദ്യവും ഹൂറിമാരും കിട്ടുമെന്ന്‌ പറയുന്ന പുസ്തകം തമാശയാണോ?

ചോ:5) ആരാണ് ഡിങ്കമതസ്ഥാപകൻ?
ഉ: ) ഒരു വ്യക്തി തനിക്ക് തോന്നും പോലെ ഒരു മതം സ്ഥാപിച്ച്, അത് ഒരു സമൂഹത്തിന് മേൽ അടിച്ചേൽപ്പിച്ചതല്ല ഡിങ്കോയിസം.
അത് ഒരു സമൂഹത്തിൻ്റെ ആത്മാവിഷ്കാരമാണ്.

ചോ: 6 ) എന്താണ് ഈ മതത്തിൻ്റെ ഉദ്ദേശ്യം?
ഉ: ) സ്നേഹം, നൻമ, സ്വാതന്ത്ര്യം, സമത്വം തുടങ്ങി പ്രതികാരം, വിദ്വേഷം, സ്പർദ്ധ ഒഴികെ ഒരു പാട് ഉദ്ദേശങ്ങളുണ്ട്.

ചോ: 7) ഡിങ്കമതം സ്വീകരിക്കാൻ എന്ത് ചെയ്യണം?
ഉ: ) സുന്നത്ത്, മാമോദീസ, ഉപനയനം തുടങ്ങിയ കലാപരിപാടികൾ ഇല്ല. ഇടുങ്ങിയ ഹൃദയം ഒന്നു വിശാലമാക്കുക… മതി നിങ്ങൾ
നിങ്ങൾ ഒരു ഡിങ്കോയിസ്റ്റ് ആയിരിക്കുന്നു…

NB : ഇത്രയൊക്കെ പറഞ്ഞെങ്കിലും ഒരു കാര്യത്തിൽ സാക്ഷാൽ ഡിങ്കന് നിങ്ങളുടെ വിളി കേൾക്കാൻ പറ്റില്ല.എല്ലാ ഡിങ്കമതവിശ്വാസികളും ഒരു നാൾ മരിക്കും. ആ സത്യം അംഗീകരിക്കാൻ മടിയാണെങ്കിൽ നിങ്ങൾ മറ്റേതെങ്കിലും മതത്തിലും ദൈവത്തിലും വിശ്വസിച്ചോളൂ.ആ വിശ്വാസം നിങ്ങളെ രക്ഷിക്കും.

മഴയെ കു റിച്ച് ഗണിച്ചപ്പോൾ ശിഷ്ട്ടംകൂട്ടാൻ വിട്ടുപോയതിനാൽ മാത്രമാണ് കാണിപ്പയ്യൂരിന് പണിപാളിയത്.പക്ഷെ ഡിങ്കജ്യോതിഷം തെറ്റില്ല.അത് ശാസ്ത്രമാണ്.ഞങ്ങൾ ശാസ്ത്രജ്ഞന്മാരും.

ഇംഗ്ലീഷ് സംസാരിക്കാം: 100 % ഗ്യാരന്റി; ചേർത്തലയിൽ സ്പോക്കൺ ഇംഗ്ലീഷ് ക്‌ളാസ് തുടങ്ങി; ഫോൺ : 9447975913