കേരളം ഒറ്റക്കെട്ടായി നിന്നു; മാതൃകാപരമായ പ്രവർത്തനമാണ് കേരളം കാഴ്ചവച്ചത്: മുഖ്യമന്ത്രി

സംസ്ഥാനത്ത് കാലവർഷം കാരണമുണ്ടായ ദുരന്തത്തെ അതിജീവിക്കുന്നതിൽ കേരളം ഒറ്റക്കെട്ടായി നിന്നെന്ന് മുഖ്യമന്ത്രി പിണറായി വിജയൻ പറഞ്ഞു. ദുരന്ത നിവാരണത്തിൽ മാതൃകാപരമായ പ്രവർത്തനമാണ് കേരളം കാഴ്ചവച്ചതെന്നും അദ്ദേഹം പറഞ്ഞു. പ്രളയക്കെടുതി വിലയിരുത്താൻ ആലുവയിൽ അവലോകന യോഗം ചേർന്ന ശേഷം വാർത്താസമ്മേളനത്തിൽ സംസാരിക്കുകയായിരുന്നു മുഖ്യമന്ത്രി.

വയനാട്, എറണാകുളം ജില്ലകളിലെ ദുരിതാശ്വാസ ക്യാമ്പുകൾ താൻ സന്ദർശിച്ചിരുന്നു. എല്ലാ ക്യാമ്പുകളിലും സംതൃപ്തമായ അന്തരീക്ഷമാണ് കാണാനിടയായത്. ചെറിയ ചെറിയ പരാതികൾ സ്വാഭാവികമാണ്. എന്നാൽ, ആകെയുള്ള ദുരന്ത നിവാരണം കണക്കിലെടുക്കുമ്പോൾ തികച്ചും മാതൃകാപരമായ പ്രവർത്തനമാണ് കേരളം കാഴ്ചവച്ചത്. ദുരന്ത നിവാരണത്തിനായി കൈ- മെയ്യ് മറന്ന് പ്രവർത്തിച്ചവരെയെല്ലാം അഭിനന്ദിക്കുന്നുവെന്നും മുഖ്യമന്ത്രി പറഞ്ഞു.

വെള്ളപ്പൊക്കത്തിൽ വീടുകൾ നഷ്ടപ്പെട്ടവർക്ക് സാധാരണ ഒരു ലക്ഷം രൂപയാണ് നൽകാറുള്ളത്. എന്നാൽ, മാനദണ്ഡങ്ങളിൽ മാറ്റം വരുത്തി സർക്കാർ അത് നാല് ലക്ഷം രൂപയായി വർദ്ധിപ്പിച്ചു. വീടും ഭൂമിയും നഷ്ടപ്പെട്ടവർക്ക് 10 ലക്ഷം രൂപയും നൽകും. വീടുകളുടേയും മറ്റ് സുപ്രധാന രേഖകൾ നഷ്ടപ്പെട്ടവർക്ക് പുതിയവ ലഭിക്കുന്നതിന് അദാലത്തുകൾ നടത്തും. ഈ അദാലത്തുകളിൽ നിന്ന് രേഖകൾ ലഭിക്കുന്നതിന് ഫീസ് ഈടാക്കുന്നതല്ല. അദാലത്ത് നടത്തുന്ന തീയതി അടിയന്തരമായി തീരുമാനിക്കാൻ ഉദ്യോഗസ്ഥർക്ക് നിർദ്ദേശം നൽകി. വിദ്യാർത്ഥികൾക്ക് സൗജന്യമായി പാഠപുസ്തകങ്ങളും നൽകും. വളർത്തു മൃഗങ്ങൾ നഷ്ടപ്പെട്ടവർക്ക് പ്രത്യേകം സഹായം നൽകും. വെള്ളപ്പൊക്കത്തെ തുടർന്ന് വീടുകളിൽ മലിനജലം കെട്ടിക്കിടക്കുന്ന സ്ഥിതിയുണ്ട്. ഇവിടെ പാമ്പുകളും മറ്റും ഇഴഞ്ഞെത്തി ശല്യമുണ്ടാക്കുന്നുണ്ട്. പാമ്പുകളുടെ കടിയേൽക്കുന്ന സാഹചര്യം ഉണ്ടായാൽ ആശുപത്രികളിൽ ആവശ്യമായ ചികിത്സാ സംവിധാനങ്ങൾ ഏർപ്പെടുത്തിയിട്ടുണ്ടെന്നും മുഖ്യമന്ത്രി പറഞ്ഞു.

ക്യാമ്പുകളിൽ സഹായം നേരിട്ടു നൽകുന്നതിനു പകരം ജില്ലാ കളക്ടർ മുഖേന നൽകണം. ക്യാമ്പുകളിൽ മെഡിക്കൽ സംഘത്തിന്റെ അതീവ ശ്രദ്ധയുണ്ടാകണം. ജില്ലയിലെ പ്രധാന റോഡുകൾ പുന:സ്ഥാപിക്കാനുള്ള നടപടികൾ ഉടൻ സ്വീകരിക്കും. പ്രളയബാധിത പ്രദേശങ്ങൾ, കോളനികൾ എന്നിവിടങ്ങളിൽ ആരോഗ്യ സംരക്ഷണ പ്രവർത്തനങ്ങൾക്ക് മുൻഗണന നൽകണം. ശുചീകരണ പ്രവർത്തനങ്ങളിൽ സർക്കാറിന്റെ മാത്രം ഇടപെടലുകൾ മതിയാവില്ല. ആരോഗ്യ, തദ്ദേശ സ്വയംഭരണ സ്ഥാപനങ്ങളോടൊപ്പം ജനകീയ ഇടപെടലുകളും ഉണ്ടാവണമെന്നും മുഖ്യമന്ത്രി അഭ്യർത്ഥിച്ചു.

മലയാളത്തിലെ ഓണ്‍ലൈന്‍ ന്യൂസ്‌ പോര്‍ട്ടലുകള്‍; ഓൺലൈൻ പോർട്ടൽ തുടങ്ങാൻ താത്പര്യമുള്ളവർക്ക് കുറഞ്ഞ ചിലവിൽ വെബ് ഡിസൈനിങ്ങിനും ഫ്രീ സർവീസിങ്ങിനും ഫോൺ: 8301021642